Eolas Fúinn

Fáilte chuig láithreán gréasáin na hOifige Acmhainní Daonna. Táimid ag leanúint orainn ag déanamh athbhreithniú ar ár láithreán gréasáin agus á fhorbairt lena chinntiú go mbeidh treoir, eolas agus tacaíocht luachmhar ar fáil air don fhoireann ar fad in Ollscoil na Gaillimhe.

Tá an Oifig Acmhainní Daonna meáite ar Ollscoil na Gaillimhe a chur chun tosaigh mar ollscoil cheannródaíoch dhomhanda a bhfuil clú agus cáil uirthi as a sainréimsí taighde, a n-aithnítear gurb í an institiúid is rogha le daoine í ó thaobh an teagaisc agus an léinn de, a bhfuil a hainm in airde as a bheith dlúthpháirteach sa phobal i gcoitinne agus a bhfuil gréasán fuinniúil comhpháirtíochtaí ag tacú léi.

Tacaímid le misean na hOllscoile pobal bríomhar de mhic léinn agus de chomhaltaí foirne a chothú, ina mbeidh foghlaim ardchéimiúil, taighde suaithinseach, agus smaointeoireacht chruthaitheach á roinnt leis an saol mór.

Déanaimid amhlaidh trí réimse seirbhísí a chur ar fáil a bhaineann le hAcmhainniú Fostaithe, Caidreamh Fostaithe, Foghlaim agus Forbairt agus ceisteanna Comhionannais.

Is é comhluadar na hOllscoile a shocraíonn meon na hOllscoile. Oibrímid i gcomhar lena chéile chun an taighde, an teagasc, an fhoghlaim agus an rannpháirtíocht phobail a chur chun cinn, agus cuireann éagsúlacht ár gcomhaltaí foirne go mór leis an obair seo. Oibrímid mar phobal mar go dteastaíonn uainn uile na caighdeáin is airde gairmiúlachta a bhaint amach inár gcuid oibre agus chomh maith leis sin, de bhrí go bhfuil bród orainn uile go bhfuilimid ag obair in Ollscoil na Gaillimhe. Dá thairbhe sin, tá meas againn ar riachtanais forbartha, ghairmiúla agus phearsanta ár gcuid comhaltaí foirne agus déanaimid iarracht freastal ar na riachtanais sin.

Is é an aidhm atá againn ná dul chun cinn a dhéanamh i gcónaí i dtaca le feidhmíocht na hOllscoile, agus an obair sin a dhéanamh i gcomhar lena chéile chun ollscoil den chéad scoth a bheith againn. Chun an aidhm seo a bhaint amach, caithfimid cuidiú le comhaltaí foirne chun barr a gcumais a bhaint amach, chun a bhfolláine phearsanta agus ghairmiúil a chothú agus chun a gcuid scileanna agus an mianach atá iontu a fhorbairt.